Саха сиригэр эбии 74 киһи коронавирустаата

Бүтэһик сууккаҕа Саха сиригэр эбии 74 киһи коронавирустаабыта бигэргэннэ. Бу туһунан бүгүн, бэс ыйын 2 күнүгэр Ил Дархан Айсен Николаев брифинг кэмигэр иһитиннэрдэ.

Дьокуускайга эбии 67 киһи ыарыйда, Алдаҥҥа — түөрт, Миирнэйгэ — икки уонна Намҥа — биир. Ыалдьыбыттары кытта алтыспыт дьону быһаары уонна изоляциялааһын үлэтэ ыытыллар.

Бу кэм устата өрөспүүбүлүкэҕэ уопсайа 2116 киһи коронавирустаата, олортон 878 киһи толору эмтэннэ, аҕыс киһи суорума суолланна.