Саха сиригэр эбии 80 киһи коронавирустаата

Саха сиригэр ааспыт сууккаҕа 80 киһи коронавирустаабыта бэлиэтэннэ. Бу туһунан бүгүн, балаҕан ыйын 29 күнүгэр өрөспүүбүлүкэтээҕи суһал штаб салайааччытын солбуйааччы, вице-премьер Ольга Балабкина брифинг кэмигэр иһитиннэрдэ.

Докуускайга 40 саҥа түбэлтэ бэлиэтэннэ, Миирнэй оройуонугар — алта, Мэҥэ Хаҥаласка — биэс. Эдьигээҥҥэ, Ньурбаҕа, Чурапчыга — түөртүү, Алдаҥҥа, Аммаҕа, Үөһээ Бүлүүгэ уонна Сунтаарга — үстүү, Булуҥҥа уонна Бүлүүгэ — иккилии. Орто Халымаҕа биир киһи коронавирустаата.

Бүтэһик суукка иһигэр өрөспүүбүлүкэ лабораториялара уопсайа 2 591 COVID-19 инфекцияҕа анаалиһы чинчийдилэр. Пандемия саҕаланыаҕыттан уопсайа 476 897 тест чинчийилиннэ.