Саха сиригэр хайаҕа ыттыы уонна альпинизм туһунан сурунаал төрүттэннэ

Саха сиригэр хайаҕа ыттыыны уонна альпинизмы сайыннарыыга туһаайыллар «Alphasakha.ru» сурунаал бастакы нүөмэрэ бэчээттэнэн таҕыста. Бу туһунан өрөспүүбүлүкэтээҕи үүнэр көлүөнэ пуондатын пресс-сулууспата иһитиннэрэр.

«Бастакы нүөмэр оҕо уонна ыччат хайаҕа ыттыыга секциятыгар ананна. Төрөппүттэр уонна оҕолор секция бырагырааматын кытта сиһилии билсиэхтэрин, хайаҕа ыттыынан дьарыктаныы оҕолорго туһатын туһунан киэҥ иһитиннэриини билиэхтэрин, иитиллээччилэр сэҥээриилэрин ааҕыахтарын сөп», – диэн этиллэр.

Бырайыак Дьокуускай куорат 2-с №-дээх оскуолатын «Тускул» медиахолдинын көмөтүнэн олохтонно. Сурунаал сыл аҥарыгар биирдэ бэчээккэ тахсар буолуоҕа.

Өрөспүүбүлүкэҕэ оҕо уонна ыччат хайаҕа ыттыытын уонна альпинизмын сайдыытын өйөөһүн Саха сирин үүнэр көлүөнэтин пуондатын биир тутаах хайысханан буолара бэлиэтэнэр.