Саха сиригэр халаан этэҥҥэ ааһан эрэр

Саха сиригэр ууга барар нэһилиэк суох
Саха сирин өрүстэригэр балаһыанньаны кэтиир суһал штаб иһитиннэрбитинэн, ууга барыан сөптөөх нэһилиэк суох. Ыам ыйын 23 күнүнээҕи туругунан Өлүөнэ өрүс мууһа Эдьигээн улууһун диэкинэн устар. Муус устата 150 килэмиэтир, сууккаҕа 70 килэмиэтир сыҕарыйбыт. Уу таһыма 972 сантиметр, критическэйэ 1150 см.
Халыма өрүскэ муус аллараа кирбиитэ Аллараа Халыма Черскэйиттэн 150 км аллараа баар, үөһээ кирбиитэ бөһүөлэктэн 180 км үөһэ. Уу таһыма 175 см.
Индигиир өрүскэ муус Хонуу бөһүөлэгин аттынан устар, уу таһыма 373 см, критическэйэ 600 см. Сууккаҕа 120 км сыҕарыйбыт. Өлөөн өрүскэ сууккаҕа муус 424 км устубут. Дьааҥы өрүскэ муус устата 180 км. Үөһээ Дьааҥы уонна Усуйаана улуустарын диэкинэн ааһар.