Саха сиригэр күһүҥҥү харааллааһын салҕанар

Саха сиригэр күһүҥҥү харааллааһын үлэтэ күргүөмнээхтик бара турар. Бу күҥҥэ 18 улууска уопсайа 95 тыһыынчаттан тахса дьиэ табатын, ол эбэтэр таба уопсай аахсааныттан 70 %-нын аахтылар.

Күһүҥҥү харааллааһын кэмигэр ааҕыыны таһынан, бэтэринээринэй тэрээһини эмиэ ыыталлар. Таба туругун көрөллөр, араас ыарыыттан утары быһыыны туруораллар. Манна анаан бэтэринэриийэ департамена өрөспүүбүлүкэ 18 табаны иитэр улууһугар туһааннаах эми-тому толору тиэрдэн олорор.

Былырыын Эдьигээҥҥэ «Баахынай» община табаларыгар аан бастаакытын анал чиптары туруоран саҕалаабыттар. Бу үлэ быйыл да салҕанна. Кэнэҕэскитин маннык ньыма бэтэринээринэй тэрээһини ыытарга табыгастаах буолуо диэн туһааннах биэдэмистибэ иһитиннэрэр. Бу түмүгэр табаттан оҥоһуллар бородууксуйа хаачыстыбата биллэ тупсуохтаах.

Бүгүҥҥү туругунан Саха сиригэр 158 тыһыынчаттан тахса таба баара биллэр. Уопсай ахсаантан 70 % таба харааллааһыны ааста. Урукку сылларга бу кэмҥэ ааҕыы үлэтин үмүрүтэн, дьон бөһүөлэккэ киирэр эбит буоллахтарына, быйыл күн-дьыл туругуттан тардылынна.       

«Этэҥҥэ бардахпытына быйыл 100 % дьиэ табатын быһыынан хабыахтаахпыт. Саха сирин үрдүнэн 29 пууҥҥа таба араас ыарыыта бэлиэтэнэр, олортон 5 улууска хотугу дьиэ табатын бруцеллеһа. Быйыл алта пууну этэҥҥэ саптыбыт. Эһиил былаан быһыытынан өссө алта пууну сабарга күүскэ үлэлэһэ сылдьабыт», — диэн СӨ тыа хаһаайыстыбатын министиэристибэтин хотугу үгэс буолбут салаа сайдыытын салаатын салайааччыта Иннокентий Баланов кэпсээтэ.

Быйыл кыһын кэккэ улуустарга табаны эбии аһатыы барыаҕа. Харааллааһыны ахсынньы 15 күнүгэр диэри түмүктүүр сорук турар.