Саха сиригэр көстүбүт хахай оҕолоро туохтан өлбүттэрэ билиннэ

Саха сирин учуонайдара Абый улууһун сиригэр-уотугар көстүбүт, былыр үйэҕэ олоро сылдьыбыт хайа хахайдарын үс оҕото туохтан өлбүттэрин уонна тыһы дуу, атыыр дуу буолалларын быһаардылар.

Санаттахха, хайа хахайын 3 оҕотун: маҥнайгы 2015 сылга көстүбүт хахай оҕотун Уян диэн ааттаабыттар, 2017 сылга көстүбүтү — Борис, 2018 сылга көстүбүтү — Спарта.

Бүтэһик хахай оҕото көстүбүтэ биир сыл буолан баран, Саха сирин наукатын Академиятын учуонайдара томографическай чинчийии ыытан, икки бастакы хахай оҕото атыыр буоларын, бүтэһик үһүс тыһы буоларын быһаардылар.

«Томографическай чинчийии түмүгэр хахай оҕолоро туохтан өлбүттэрэ быһаарылынна. Уян төрөөн баран уһаабыта аҕыйах чаас олорбут, ийэ хахай төрөөн баран тутатына быраҕан барбыт. Борис сабаҕалааһын быһыытынан хампы баттааһынтан өлбүт, кини төбөтүн уонна атын да уҥуохтара тостубуттар. Спарта аччыктаан өлбүтэ билиннэ», — диэн Саха сирин наукатын Академиятын мамоннар фауналарын үөрэтэр салаатын салайааччыта Альберт Протопопов кэпсээтэ.