Саха сиригэр киинэ каскадердарын үөрэтиигэ кастинг биллэрдилэр

Саха сирин киинэ эйгэтигэр салгыы үлэлиир каскадердары бэлэмниир куурустарга үөрэниэн баҕалаахтартан сайаапкалары тутуу саҕаламмыт. Бу туһунан «Art Doydu» хампаанньа пресс-сулууспата иһитиннэрэр.

Куурустары Казахстантан сылдьар «Nomad Stunts» норуоттар икки ардыларынааҕы идэтийбит каскадердар бөлөхтөрө ыытыаҕа.

«Эһигини араас хайысханан каскадер маастарыстыбатыгар үөрэтиэхтэрэ: аттаах трюктар, акробатика, пиротехника, SFX, араас сэрии сэбиргэллээх охсуһуулаах сценаларын туруоруу уонна толоруу, риггинг (ыйанар систиэмэлэринэн үлэ), умайыы, сценаҕа хамсаныы, үрдүктэн сууллуу», — диэн этиллэр.

Үөрэнээччилэр аан дойдутааҕы киинэ былаһааккаларыгар практиканы ааһаллара бэлиэтэнэр.

Кандидаттарга ирдэбил: 19-23 саастаах, биэстэн итэҕэһэ суох сыл спордунан дьарыктаммыт (спортивнай гимнастика/акробатика/тхэквондо/каратэ), аты миинии уопута. Ону таһынан английскай тылы билии уонна киинэҕэ үлэ уопута эмиэ сэҥээриллэр.

«Арт Дойду» уонна «Nomad Stunts» хампаанньалар икки ардыларыгар түһэрсиллибит сөбүлэһиинэн каскадердары үөрэтии босхо буолар уонна Казахстан Алма-Аты куоратын чугаһыгар баар каскадердар баазаларыгар ыытыллыаҕа. Талыыны ааспыт дьоҥҥо көтүү, олоруу, ас-үөл ороскуота толуйуллар, ону таһынан стипендия көрүллэр.

Сайаапкалары 2021 кулун тутар 15 күнүгэр диэри ыйыллыбыт электроннай почтаҕа ыытыахха сөп: artdoydu.ltd@gmail.com.

Сиһилии иһитиннэриини кытта «Арт Дойду» хампаанньа сайтыгар билсиҥ.