Саха сиригэр коронавируһунан ыалдьыы сэттэ түбэлтэтэ чахчы бигэргэннэ

Ил Дархан Айсен Николаев бүгүн, кулун тутар 20 күнүгэр өрөспүүбүлүкэҕэ коронавирустан олохтоммут усулуобуйа туругун боппуруостарынан суруналыыстары кытта көрсүһүү кэмигэр, Саха сиригэр коронавируһунан ыалдьыбыт киһи ахсаана сэттэҕэ тиийбитин иһитиннэрдэ.

«Роспотребнадзор ЯТЭК хампаанньа алта исписэлииһин аналиһын чинчийии түмүгүнэн COVID-19 вируһа баарын бигэргэттэ. Билиҥҥи туругунан өрөспүүбүлүкэҕэ коронавируһунан ыалдьыы сэттэ түбэлтэтэ бэлиэтэннэ», – диэн Ил Дархан иһитиннэрдэ.

Инники этиллибитинэн, Саха сиригэр маҥнайгынан коронавируһунан ыалдьыбыт ЯТЭК хампаанньа генеральнай дириэктэрэ Андрей Коробов үтүөрэн эрэр.