Саха сиригэр кыһыл көмүс сыбаайбаларын бэлиэтиир дьиэ кэргэн элбии турар

Саха сиригэр сылын ахсын үйэ аҥарын устата бииргэ олорон, кыһыл көмүс сыбаайбаларын бэлиэтиир дьиэ кэргэн ахсаана элбии турара бэлиэтэнэр.

«2017 сылтан ылата «Саха сирин көмүс дьиэ кэргэттэрэ» диэн бочуот кинигэтин таһаарабыт. Бастакы таһаарыыга 60-тан аҕыйах дьиэ кэргэн киирбитэ. Бүтэһик таһаарыыга 101 дьиэ кэргэн киириэҕэ. Бу муҥутуур көрдөрүү буолбатаҕын билэбит», – диэн гражданскай турук аактатын суруйар управление сүрүннүүр исписэлииһэ Анна Михайлова кэпсээтэ.

Сэтинньи 8 күнүгэр Дьокуускайга гражданскай турук аактатын суруйар управление саалатыгар Тимофей Васильевич уонна Нина Егоровна Ноевтар кыһыл көмүс сыбаайбаларын бэлиэтээтилэр.

Бу дьиэ кэргэн 1969 сыл ахсынньы 1 күнүгэр төрүттэммит. Үйэ аҥарын устатыгар дьоллоохтук бииргэ олорон түөрт оҕолоохтор, 10 сиэнээхтэр уонна хос сиэннэрин кэтэһэллэр.

Ноевтар дьиэ кэргэҥҥэ Ил Дархан Айсен Николаев эҕэрдэ суругун уонна «Дьиэ кэргэн килбиэнэ» бэлиэни туттардылар, ону тэҥэ кинилэр ааттара быйылгы «Саха сирин көмүс дьиэ кэргэттэрэ» бочуот кинигэҕэ киириэҕэ.