Саха сиригэр кырдьаҕас дьоҥҥо аналлаах саҥа сыһыарыы баар буолуо

Саха сиригэр аҕам саастаах дьоҥҥо арыалдьыт эбэтэр дьиэ үлэтигэр көмө буолар киһини көрдүүллэригэр аналлаах IT-бырагырааманы олоххо киллэриэхтэрэ. Бу туһунан СӨ баһылыгын уонна бырабыыталыстыбатын  пресс-сулууспата иһитиннэрэр.

Бу бырайыагы «Кырдьаҕас дьону көрүүгэ-истиигэ саҥа быһаарыылар уонна сыһыаннар» диэн ис хоһоонноох, социальнай эйгэҕэ аныгылыы үрдүк таһымнаах IT-быһаарыылары уонна өҥөлөрү олоххо киллэриигэ туһаайыллар көрсүһүү-мунньахха дьүүллэстилэр.

«Бырайыак сүрүн соруга — саҥа бырагыраама дьоҥҥо тиийимтиэ буолуохтаах. Хайа баҕарар киһи ханнык эмэ быһыы-майгы үөскээтэҕинэ, тутатына дьиэ үлэтигэр эбэтэр арыалдьыт буолар киһини көмөҕө ыҥырар кыахтаныахтаах», — диэн Дьокуускай куорат кырдьаҕастар уонна доруобуйаларынан хааччахтаах дьон олорор интернат дьиэлэрин социальнай боппуруостарынан дириэктэри солбуйааччыта Роза Олесова кэпсээтэ.

Бырайыак кырдьаҕас киһини балыыһаҕа барарыгар, пааркаҕа сылдьарыгар арыаллыыр, эти-хааны чэбдигирдэр дьарыгы ыытар уонна да атын соругу, иллэҥ кэмигэр бэйэтин баҕатынан толорорго бэлэм дьону көрдүүр соруктаах буолуо диэн бэлиэтэнэр.