Саха сиригэр мөлүйүөн аҥарын кэриҥэ коронавируска тест оҥоһулунна

Өрөспүүбүлүкэ лабораторияларыгар 500 тыһыынча кэриҥэ коронавируска тест оҥоһулунна.

Бу туһунан «Актуальное интервью» биэриигэ өрөспүүбүлүкэтээҕи Роспотребнадзор салайааччыта Маргарита Игнатьева иһитиннэрдэ.

«Роспотребнадзор уонна СӨ Доруобуйа харыстабылын министиэристибэтэ көмөлөөн мөлүйүөн аҥарын кэриҥэ коронавируска тест оҥоһулунна. Уопсайа күҥҥэ 4-4,5 тыһыынча тест оҥоһуллар», — диэтэ Маргарита Игнатьева.

Кини этэринэн, өрөспүүбүлүкэҕэ 14 ПЦР лабораторията суукканы быһа үлэлиир. Балартан 10 — Дьокуускайга, маны таһынан, Нерюнгри, Миирнэй, Ленскэй уонна Алдан оройуоннарыгар — биирдии.

«Лабораторнай чинчийиини ыытыы уонна анааһын санитарнай быраабыла ирдэбилинэн ыытыллар. Пневмониялаабыт уонна ОРВИ-нан ыалдьыбыт дьон бастакы уочарат көрүллэллэр, маны таһынан, кыраныысса таһыттан кэлбит, 65-тэн аҕа саастаахтар уонна коронавирустаабыт дьону кытта алтыспыт дьон», — диэн Роспотребнадзор салайааччыта бэлиэтээн эттэ.