Саха сиригэр маҥнайгы купол бүрүһүөннээх дьиэ баар буолуо

Сотору кэминэн «Кангаласс» урутаан сайдыы сиригэр купол бүрүһүөннээх дьиэ баар буолуо.

«Бу бырайыак сыл саҕаланыыта ХИФУ уонна «Синет» хампаанньа түһэрсибит сөбүлэһиитин чэрчитинэн олохтонно. Аҕыйах ый иһигэр куполлаах эбийиэк тутуутун түмүктээн эрэбит», – диэн ХИФУ айан суолун факультетын декана Дмитрий Филиппов кэпсээтэ.

Купол дьиэ турар сирин анныгар баар ууллубат мууска хайдах дьайыаҕа биллибэт. Ону үөрэтэргэ дьиэ таһыгар сиргэ, буор кырсын чинчийэр анал термодатчиктары туруордулар.

2013 сыллаахха маннык курдук куполлаах дьиэни Норвегия дойдутун хоту өттүгэр тутуллубута биллэр. Ол эрээри купол тутуутугар тимири уонна өстүөкүлэни туттубуттар. Саха сиригэр куполы тимиртэн уонна өҥө суох курдары көстөр пластмасса оҥоһугуттан туталлар.