Саха сиригэр муоста тутуутугар уонна суол өрөмүөнүгэр түөрт милиард солкуобай көрүллүөҕэ

Өрөспүүбүлүкэ айан суолун өрөмүөнүгэр бэдэрээлинэй бүддьүөттэн 4,2 милиард солкуобай көрүллүөҕэ. Бу туһунан Уһук Илини уонна Арктиканы сайыннарыы министиэристибэтин пресс-сулууспата иһитиннэрэр.

Дойду бырабыыталыстыбата «Куттала суох уонна хаачыстыбалаах айан суоллара» национальнай бырайыак чэрчитинэн муниципальнай уонна региональнай суолталаах айан суолларын өрөмүөннүүр бырагыраамаҕа уларытыыны киллэрдэ.

Докумуон быһыытынан, 2020-2024 сылларга Уһук Илин уокуругар 34,8 милиард солкуобайы эбии туһаайыахтара. Онон 39 суол ситимэ уонна 11 килэмиэтир муоста суола оҥоһуллуоҕа.