Саха сиригэр ойуур баһаардарын умуруорарга 390,9 мөлүйүөн солкуобайы ыытыахтара

Саха сиригэр ойуур баһаардарын умулларыы бары үлэтин оҥорорго эбии үбүлээһин көрүллэрэ ирдэнэр. Ил Дархан Айсен Николаев Дмитрий Медведевтэн РФ бырабыыталыстыбатын саппаас пуондатыттан 390,9 мөлүйүөн солкуобайы ыытарга көрдөстө. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

РФ бырабыыталыстыбатын бэрэссэдээтэлэ Айсен Николаев көрдөрүүһүтүн ылынан, сотору кэминэн бу харчыны Саха сиригэр ыытыахтара.

Авиалесоохрана иһитиннэрэринэн, Саха сирин үрдүнэн бүгүҥҥү күҥҥэ  916 548,6 гектарга 116 ойуур баһаара бэлиэтэммит. Олортон, хонтуруолланар сирдэртэн ураты, Алдан, Дьааҥы, Мэҥэ Хаҥалас, Нерюнгри, Ньурба, Өлүөхүмэ, Сунтаар, Уус Алдан улуустарыгар уонна Дьокуускайга 1 267, 6 га сиргэ 15 ойуур баһаарын умуллара сылдьаллар.

Ааспыт күннэргэ Саха сиригэр 15 очагынан ойуур баһаара аҕыйаабыт, түөрт баһаары төгүрүппүттэр. Өрөспүүбүлүкэ үрдүнэн Россия Ыксаллаах быһыы-майгы министиэристибэтин авиация бөлөҕө тэриллибит.

Россия ЫБММ Хабаровскайдааҕы авиационнай быыһыыр кииниттэн Бе-200 икки сөмөлүөт кэлэн, Мииринэй куоракка уонна Дьокуускайга тохтоон үлэлииллэр. Уу кутардаах Ми-8 икки бөртөлүөт Дьокуускайга уонна Сунтаар сэлиэнньэтигэр тохтууллар.