Саха сиригэр окко киириигэ бэлэмнэнии ыытыллар

Саха сиригэр быйыл сайын 71 495 тонна от, 16 112 тонна сенаж уонна 25 567 тонна силос бэлэмнэнэрэ былааннанар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Билигин оттуур ходуһалар үүнүүлэрин уонна муниципальнай оройуоннарга страховой саппааһын тэрийии кээмэйин учуоттаан, бэлэмнэниэхтээх сүөһү аһылыгын барыллаан былаанын бырагыраамата чуолкайданар. Оройуоннарга улуус уонна бөһүөлэк таһымнарыгар оперативнай штабтар тэриллиннилэр», — СӨ тыатын хаһаайыстыбатын миниистирин солбуйааччы Николай Афанасьев кэпсээтэ.

Тыа хаһаайыстыбатын министиэристибэтэ тириэрдэринэн от ыйыгар 37 тыһыынча кэриҥэ киһи, 10 тыһыынча кэриҥэ звено уонна 12 тыһыынчаттан тахса тыраахтыр от үлэтигэр кыттыыны ылыаҕа. Маассабай окко киирии от ыйын ортото саҕаланыаҕа.

Онуоха диэри бары бэлэмнэнии үлэлэрэ түмүктэниэхтээхтэр: мелиоративнай үлэлэр, аһыҥаны утары охсуһуу, тыа хаһаайыстыбатын техникатын көрүү-истии, ходуһалар тиийэр суолу-ииһи уонна муосталары өрөмүөннээһин.