Саха сиригэр орто анал үөрэх систиэмэтин сайыннарыыга үлэ барар

Ил Дархан Айсен Николаев орто анал үөрэхтээһин систиэмэтин сайыннарыы уонна тупсарыы боппуруостарын дьүүллэһэр сүбэ мунньаҕы ыытта. Бу туһунан СӨ баһылыгын уонна бырабыыталыстыба пресс-сулууспата иһитиннэрэр.

Орто анал үөрэхтээһин систиэмэтин тупсарыы бырамыысыланнас салаата уонна өрөспүүбүлүкэ экономиката сайдарыгар сүрүн суолталааҕын Ил Дархан бэлиэтээтэ.

Орто анал үөрэх систиэмэтигэр аныгы кэм ирдэбилигэр эппиэттиир идэҕэ үөрэтиини ыытарга кэмигэр сөптөөх үлэ барбатаҕын түмүгэр, күн бүгүн бырамыысыланнас сорох салааларыгар ыччат үлэ булара уустугун туһунан санаатын эттэ.

«Сыһыаммытын тосту уларытан, орто анал үөрэхтээһин систиэмэтин сайыннарыыны түргэнник олоххо киллэриэхтээхпит. Биһиги сүрүн сыалбыт – үлэ ырыынагар аныгылыы ирдэбилгэ эппиэттиир кыахтаах систиэмэни толуйан, инникитин регион экономиката үрдүүрүн хааччыйыы»,  — диэн Айсен Николаев бэлиэтээтэ.

Күн бүгүн Саха сиригэр 24 улууска уонна икки куоракка колледжтар уонна техникумнар үлэлииллэр. Уларыйыы уонна сайдыы түмүгэр, 2021 сылга өрөспүүбүлүкэ бары муниципальнай тэриллиилэригэр орто анал үөрэх тэрилтэлэринэн тэрийии күүтүллэрин туһунан СӨ үөрэх уонна наука миниистирэ Владимир Егоров иһитиннэрдэ.

Оскуоланы бүтэрээччилэр колледжтарга уонна техникумнарга киириилэрэ үрдүгүн бэлиэтээтэ. 2019 сылга үөрэххэ ылыы хампаанньата көрдөрбүтүнэн, тохсус кылаас кэнниттэн орто үөрэххэ биир миэстэҕэ икки киһи туттарсыбыт.

«Колледжтары уонна техникумнары бүтэрээччилэри үлэнэн хааччыйыыны 2018 сыл 53,8 %-ҥа тэҥнэһэр көрдөрүүтүн, 2024 сылга 70 %-ҥа диэри үрдэтэр сыалы туруорабыт. Бу сыалы толуйарга дуальнай үөрэхтээһини киллэрии, цифровой үөрэх эйгэтин тэрийии, сыаллаахтык үөрэтиини сайыннарыы курдук үөрэҕирии саҥа бырайыактарын олоххо киллэрии ыытыллар», — диэн Владимир Егоров кэпсээтэ.

Орто анал үөрэҕи бүтэрээччилэр ылар квалификациялара үлэ ырыынага, үлэ биэрээччи уонна сакаасчыт ирдиирдэбилигэр эппиэттээһинэ, эдэр исписэлиис үлэнэн хааччыллыытын уонна анал үөрэҕин төһө хаачыстыбалаахтык баһылаабытын көрдөрөр сүрүн бэлиэ буоларын мунньах кыттыылаахтара бэлиэтээтилэр.

СӨ үөрэх уонна наука министиэристибэтэ уонна «Эдэр профеционаллар» WorldSkills Russia хамсааһын өрөспүүбүлүкэтээҕи сүрүннүүр киинэ, Саха сирин сүүмэрдэммит хамаандаттын ордук суолталаах орто үөрэх идэлэригэр бэлэмнииргэ туһаайыллар «Ситиһии формулата» уонна «Ситиһии фактора» диэн бырайыактары оҥорон бэлэмнээтэ.

Саха сирэ биир бастакынан «Эдэр профессионаллар» хамсааһыҥҥа кыттыһан, регион, Россия уонна норуоттар икки ардылырынааҕы таһымнаах күрэхтэргэ үчүгэй көрдөрүүлэммитин, ол эрээри, кэлиҥҥи сылларга төттөрү түһүү көстөрүн уонна ону туоратыыга ыытыллар үлэ ирдэнэрин туһунан Айсен Николаев эбэн эттэ.  

Ол туһугар судаарыстыбаннай колледжтар уонна техникумнар материальнай базаларын уонна кадрдар ис кыахтарын үрдэтиигэ, «Эдэр профессионаллар» национальнай чөмпүйэнээт сүүмэрдиир күрэҕин ыытыыга, өрөспүүбүлүкэ сүүмэрдэммит хамаандатын идэ маастарыстыбатын национальнай чөмпүйэнээтигэр бэлэмнээһиҥҥэ сүрүн болҕомтону ууруллуо.