Саха сиригэр от ыйын 2 күнүттэн хааччахтааһын уһуллуон сөп

От ыйын 2 күнүттэн өрөспүүбүлүкэҕэ коронавирус инфекцията тарҕаныытын сэрэтэр дьаһалларынан ылыллыбыт хааччахтааһыннар уһуллуохтарын сөп.

Саха сиригэр инфекция тарҕаныытын коэффициена 0,7-ҕэ диэри түспүтүн туһунан Ил Дархан Айсен Николаев брифинг кэмигэр иһитиннэрдэ. Хааччаҕы уһуларга, бу көрдөрүү 0,8-ка тэҥнэһиэхтээх.

«Бу көрдөрүү намтааһына хааччахтыыр дьаһаллары уһулар туһунан этии киллэрэргэ кыах биэрдэ, Россия Роспотребнадзорун быһаарыытын кэтэһэбит. Сайаапканы бигэргэттэхтэринэ, от ыйын 2 күнүттэн хааччахтар уһуллуохтара», – диэн Ил Дархан эттэ.

Ол курдук, 65 саастарыттан аҕа уонна хроническай ыарыылаах дьонтон ураты, атытарга бэйэ изоляциятын эрэһиимэ уһуллуоҕа.

Мииринэй оройуонун Удачнай уонна Айхал бөһүөлэктэригэр хааччахтыыр дьаһаллар оннунан хаалаллар.

Атыы-эргиэн кииннэрин (эбийиэк иһигэр баар аһыыр уонна оонньуур сирдэртэн ураты), музейдар, сайыҥҥы кафелар, туристическай баазалар, библиотекалар аһыллыахтара. Ону тэҥэ бары булгуччулаах санитарнай-эпидемиологическэй ирдэбиллэри тутуһар тэрээһиннээх сөтүөлүүр сирдэр үлэлэрэ көҥүллэниэҕэ. Улуустар икки ардыларыгар таксилар, автобустар уонна уу суудуналарын сырыыта сөргүтүллүөҕэ.

Балаһыанньа салгыы тупсар түгэнигэр, от ыйын 15 күнүттэн хааччахтааһыннары уһулуу үһүс түһүмэҕэ саҕаланыан сөптөөҕүн Айсен Николаев бэлиэтээтэ.