Саха сиригэр пандемия кэмигэр үөрэҕи тэрийии сүбэлэрэ бэлэмнэннилэр

Саха өрөспүүбүлүкэтин үөрэҕириигэ уонна наукаҕа министиэристибэтэ 2020-2021 үөрэх дьылыгар пандемия усулуобуйатыгар үөрэх процеһын тэрийиигэ методическай сүбэлэри бэлэмнээтэ. Бу туһунан министиэристибэ пресс-сулууспата иһитиннэрэр.

Тустаах рекомендациялар үөрэх хаамыытын тэрийии киэптэрин кытта Саха сирин бырабыыталыстыбатын бэрэссэдээтэлин солбуйааччы эбээһинэһин толорооччу Сергей Местниковка ыытылыннылар.

Үөрэх процеһын тэрийии маҥнайгы киэбэ Роспотребнадзор ирдэбилин толору тутуһуохха сөптөөх малокомплектнай оскуолаларга ананар, иккис киэп — биир симиэнэлээх оскуолалары икки симиэнэлээххэ көһөрүүннү учуоттуур. Үһүс киэп икки симиэнэн очнай-дистанционнай быһыынан үөрэтиини дьүөрэлиир. Төрдүс уонна бэһис киэптэр улахан оскуолаларга очно-заочнай быһыылаах үс симиэнэнэн үөрэтиигэ ананаллар.

Маҥнайгы киэп өрөспүүбүлүкэ 418 оскуолатыгар туһаныллыаҕа, иккис- 147 оскуолаҕа, үһүс — 47 оскуолаҕа, төрдү — 24 оскуолаҕа.

Үөрэх процеһын тэрийии бэһис киэбэ Дьокуускай куорат 31-с №-дээх, 26-с №-дээх, 21-с №-дээх, 20-с №-дээх, 7-с №-дээх орто оскуолаларын курдук, 13 улахан оскуолаҕа туһаныллыаҕа.

Маны таһынан үөрэх усулуобуйатын тэрийиигэ ураты ирдэбиллэри тутуһуу ирдэнэр: хас биирдии кылааска туспа кэбиниэт анааһын; оскуолаҕа биир кэмҥэ үөрэнэр оҕо ахсаанын аччатыы; туспа графигынан дьиэ иһин булгуччу салгылатыы уонна ыраасааһын; үөрэнээччилэри кылаас иһигэр паартаҕа соҕотохуу зигзаг быһыылаах олордуу ньыматынан, бэйэ-бэйэлэриттэн 1,5 миэтирэ тэйиччи социальнай арыты тутуһууларын хааччыйыы.

Инники этиллибитин, Саха сирин бары оскуолаларыгар балаҕан ыйын 1 күнүтэн үөрэх дьыла саҕаланыаҕа.