Саха сиригэр региональнай таһымнаах ыксаллаах балаһыанньа биллэрилиннэ

Үрдүк кылаастаах ойуур баһаардара тахсыыларынан уонна нэһилиэнньэлээх пууннарга куттал суоһаабытынан сибээстээн Саха сиригэр региональнай таһымнаах ыксаллаах быһыы-майгы эрэһиимэ биллэрилиннэ. Ил Дархан Айсен Николаев анал уураахха илии баттаата диэн СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Өрөспүүбүлүкэҕэ ордук элбэх баһаар хоту улуустарга баара бэлиэтэнэр. Абый, Аллараа Халыма, Эбээн Бытантай уонна Орто Халыма улуустарыгар ойуур баһаардарыттан сибээстээн муниципальнай таһымнаах ыксаллаах балаһыанньа биллэрилиннэ», — диэн ыксаллаах быһыыны-майгыны сэрэтии уонна туоратыы хамыыһыйатын мунньаҕар СӨ бастакы вице-премьерэ Алексей Колодезников эттэ.

Вице-премьер улуустар баһылыктарыгар ойуур баһаардарын бохсууга суһал миэрэлэри ылалларыгар соруйда.

Эппиэтинэстээх биэдэмистибэлэргэ сарсын Үөһээ Дьааҥы улууһугар сөмөлүөтүнэн уоту утары охсуһууга эбии көмө ыытарга уонна Орто Халымаҕа үлэҕэ туттуллар тиэхиньикэ саппаас чаастарын ыыталларыгар соруйда.

Ону сэргэ салайааччылар баһаар нэһилиэнньэлээх пууннарга кутталы үөскэтиитин кытаанах хонтуруолга туталларыгар ыҥырда.