Саха сиригэр сүөһү кыстыга былаанынан барар

Ынах сүөһү уонна сылгы кыстыга өрөспүүбүлүкэ улуустарыгар былаанынан барар.

Бу туһунан СӨ тыа хаһаайыстыбатын миниистирэ Александр Атласов социальнай ситимҥэ быһа эпииргэ иһитиннэрдэ.

«Ааспыт сайын ыарахан балаһыанньатын аахсыбакка 460 тыһыынча туонна от бэлэмнэннэ. Бүгүн от саппааһа 250 тыһыынча туоннаҕа тэҥнэһэр, 13 тыһыынчаттан тахса сиилэс уонна алта тыһыынчаттан тахса сенаж. Бу хаалбыт от кыстык бүтүөҕэр диэри тиийэр», — диэн кини бэлиэтээтэ.

Киин уонна илин эҥэр улуустарга кураан сайын буолан, мобильнай биригээдэлэри тэрийэргэ 22 мөлүйүөн солкуобайы көрбүттэр.

Тыа баһаарыттан эмсэҕэлээбит оттуур сири бас билээччилэргэ тоҕус мөлүйүөн солкуобай көрүллүбүт. Ол курдук, 2020 сылга 2,4 туонна от уокка былдьаммыт.

«Бырабыыталыстыба отчуотун кэмигэр, бу матырыйаалынай көмөнү кыайан ылбатахтарын туһунан боппуруостар киирбиттэрэ. Билигин биһиги балаһыанньаны үөрэтэбит, туһаныллыбатах үбү-харчыны улуустар кулун тутар ый түмүктэниэр диэри төннөрөллөрө ирдэнэр. Бу кыһалҕалары улуус баһылыктарын кытта быһаарыахпыт», — диэтэ Александр Атласов.