Саха сиригэр сааскы халааҥҥа бэлэмнэнии саҕаланна

Бүгүн, олунньу 14 күнүгэр, ыксаллаах быһыыны-майгыны сэрэтии уонна ууратыы, ону тэҥэ сааскы халааҥҥа бэлэмнэнии хамыыһыйатын мунньаҕа ыытылынна. Бу туһунан СӨ баһылыгын уонна бырабыыталыстыбатын пресс-сулууспата тириэрдэр.

«Иһитиннэрии киирбитин кэнниттэн үс чаас иһигэр көтөргө бэлэм 15 көтөр аал көрүлүннэ. Өрөспүүбүлүкэҕэ муус барыытын кэмигэр Россия ыксаллаах быһыыга-майгыга министиэристибэтин кытта бииргэ мобильнай көрсөр-ыытар комплексы туһаныы былааннанар», — диэн СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков иһитиннэрдэ.

Өлүөнэ, Халыма, Амма, Алдан, Нүүйэ, Токко өрүстэргэ мууһу чарааһатыы үлэлэригэр 31,3 мөлүйүөн солкуобай көрүллүбүтэ бэлиэтэнэр. Сааскы халааны сэрэтии үлэлэрин хонтуруолун Ленатааҕы уу бассейнын управлениета ыытар.

Мууһу чарааһатыы үлэлэрэ 46 учаастакка ыытыллыахтара, олортон 39-гар мууһу хараардыы уонна эрбээһин былааннанар.