Саха сиригэр сааскы харааллааһын ыытыллар

Саха сирин табаһыттара сааскы харааллааһыны ыыталлар. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Сааскы харааллааһын Эбээн Бытантай уонна Томпо улуустарыгар саҕаланна, оттон Өлөөн уонна Булуҥ улуустарыгар хайыы үйэ түмүктэннэ.

«Тэрээһин былаанынан, табаһыттар биригээдэлэрэ табалар ахсааннарын саастарынан ааҕаллар, ыстааданы тугут төрөөһүнүгэр бэлэмнииллэр, тыһы табалары араараллар, быһыы оҥороллор уонна аналистары ылаллар. Маны тэҥэ табалары чиптээһин ыытыллар. Исписэлиистэр кыстык этэҥҥэ ааспытын бэлиэтииллэр», — диэн министиэристибэ хотугу үгэс буолбут дьарыгы сайыннарыы салаатын салайааччыта Иннокентий Баланов кэпсээтэ.

Харааллааһын муус устар ый ортотугар түмүктэнэрэ былааннанар. Быйылгы кыстык этэҥҥэ ааспыта этиллэр.

«Алдан, Өлөөн, Дьааҥы уонна Эбээн Бытантай улуустарыгар бөрөлөр элбээбиттэрин туһунан иһитиннэрии баар. Миэстэтигэр бөрө утары үлэ барар. Бастатан туран хаһаайыстыбалар киин уһаайбаларыгар хапхааннары, сүлүһүннээх эмтэри, саппаас оттугу ылан тириэрдии оҥоһуллар. Маны тэҥэ табаһыттары бородуукта саппааһынан уонна тээбириннэринэн хааччыйыы ыытыллар», — диэн Иннокентий Баланов эттэ.

Өрөспүүбүлүкэҕэ бүгүҥҥү күҥҥэ дьиэ табатын ахсаана 145 тыһыынча төбөҕө тэҥнэһэр, бу былырыыҥҥы көрдөрүүттэн 12,4 тыһынча төбөнөн аҕыйаҕа бэлиэтэнэр.

Саха сиригэр таба иитиитинэн уопсайа 106 хаһаайыстыба уонна 1,2 тыһыынча киһи дьарыктаран.