Саха сиригэр сэтинньи 25 күнүттэн Олоҥхо декадата саҕаланыа

Сэтинньи 25 күнүттэн ахсынньы 10 күнүгэр диэри өрөспүүбүлүкэҕэ Олоҥхо декадата ыытыллыа. Декада чэрчитинэн араас хабааннаах туруоруулар, быыстапкалар уонна дьүүллэһиилэр буолуохтара. Бу туһунан СӨ култууратын уонна духуобунаһын министиэристибэтин пресс-сулууспата иһитиннэрэр.

Декаданы Дьокуускайга Норуоттар доҕордоһууларын дьиэтигэр сэтинньи 25 күнүгэр үөрүүлээхтик аһыахтара.

«Тэрээһин олоҥхону толорууттан уонна үбүлүөйдээх олоҥхоһуттары чиэстээһинтэн саҕаланыа. Үөрүүлээх киэһэ муҥутуур чыпчаалынан  тылынан уус-уран айымньыны нэһилиэстибэ быһыытынан тарҕатыы уонна харыстааһын иһин Национальнай бириэмийэни туттарыы буолуо. Түмүгэр үөрүүлээх тэрээһин ыалдьыттарыгар кэрэхсэбиллээхтик, уратытык туруоруллубут олоҥхону оонньоон көрдөрүөхтэрэ», — диэн иһитиннэриигэ этиллэр.

Маны таһынан, Олоҥхо декадатын чэрчитинэн Былатыан Ойуунускай аатынан судаарыстыбаннай бириэмийэ лауреата Агафья Захарова үбүлүөйдээх кэмпириэнсийэтэ ааһыа.

Аан дойду таһымыгар олоҥхону үөрэтиигэ кылааттарын киллэрбит Турция учуонайдара Метин уонна Первин Эргюннар кыттыыны ылыахтара.

Олоҥхо Декадатын үөрүүлээхтик түмүктээһин кэмигэр Норуоттар доҕордоһууларын дьиэтигэр «Кулан Кыыртай» олоҥхо-испэктээх буолуо.