Саха сиригэр «Skills Camp 2020» үөрэх бырагыраамата саҕаланна

Бэс ыйын 11 күнүгэр «Skills Camp» кэлэр көлүөнэ пааркатын үөрэҕириитин киинин уһулуччулаах пилотнай бырагыраамата саҕаланна. Бу туһунан өрөспүүбүлүкэтээҕи үүнэр көлүөнэ пуондатын пресс-сулууспата иһитиннэрэр.

Бу Саха сирин педагогтарын үөрэтэр акселерат буолар. Учууталлар оҕолор өрөспүүбүлүкэ креативнай экономикатын сайыннарарга аналлаах дьоҕурдарын арыйар бырагыраамалары оҥорорго үөрэниэхтэрэ.

Саҥа бырагыраамаҕа 15 хамаанда талыллан киирдэ. Кинилэри аан дойду уонна бүтүн Россия таһымнаах биллэр экспертэр үөрэтиэхтэрэ. Маннык синергия үрдүк таһымнаах кадырдары бэлэмнээһиҥҥэ уонна оҕолор сайдалларыгар уһулуччу ураты эйгэни үөскэтэргэ кыах биэрэр.

Кэлэр көлүөнэ паарката бырайыак «Инникигэ хардыы» бырагыраама чэрчитинэн АЛРОСА хампаанньа үбүлээһининэн, өрөспүүбүлүкэтээҕи үүнэр көлүөнэ пуондата, Саха сирин сайыннарыы корпорацията уонна СӨ үөрэххэ министиэристибэтэ бииргэ үлэлэһиилэрин түмүгэр — саҥа тииптээх үөрэх киинэ буолар сыаллаах.

Аан маҥнайгытын куорат киинигэр, ирбэт тоҥ усулуобуйатыгар сылы эргиччи туһаныллар паарка үлэлиэҕэ. Паарка Саха сирин олохтоохторун култуурнай, духуобунай сайдыыларын уонна сынньалаҥнарын эрэ буолбакка, оҕолор, эдэр ыччат уонна педагогтар элбэх хайысхалаах үлэнэн дьарыктанар кииннэринэн буолара былааннанар.