Саха сиригэр «Союзмульфильм» кыттыылаах анимация киинэ аһыллара былааннанар

Өрөспүүбүлүкэҕэ «Союзмульфильм» кыттыылаах аниматордары үөрэтэр киин тэриллиэн сөп.

Бу туһунан «Синергия» вице-бэрэсэдьиэнэ Ольга Грищенко кэпсээтэ. Корпорация 2020 сыл түмүктэниитэ Саха сирин бырабыыталысытбатын кытта үөрэх эйгэтин уонна оҕо сынньалаҥын сайыннарыыга бииргэ үлэлээһин туһунан сөбүлэҥ түһэрсибитэ.

«Үөрэхтээһин эйгэтигэр хас да инвест-бырайыактары былаанныыбыт — цифровой технологиялар колледжтара, «Үлэ кыбаартала» арткластер уонна «Полярная звезда» бырайыагынан үлэ саҕаланна», — диэн иһитиннэрдэ.

Ольга Грищенко Саха сирэ Россия IT- технологияларын сайыннарыыга бастыҥ буоларын бэлиэтээтэ, онон өрөспүүбүлүкэҕэ бу эйгэҕэ үлэлиир бэлэмнээх каадырдар наадаларын бэлиэтээтэ.

«Саха сирэ хайыы- үйэ бэйэтин технологияларын экспортыыр, онон бэлэм каадырдарга наадыйар. Идэтийбит исписэлииһи үөрэтиигэ биэс сыл наада, чуолаан профессиональнай колледж таһыма идэни түргэнник баһылыырга көмөлөһүөҕэ», — диэн «Синергия» вице-бэрэсэдьиэнэ тоһоҕолоон бэлиэтээтэ.

Үөрэх бырагыраамалара өрөспүүбүлүкэҕэ үлэлиир IT-хампаанньаларга анаан оҥоһуллуохтарын сөп диэн эбэн эттэ.

«Иккис үөрэтии бырайыага – Анимация киинэ — бу биһиги «Союзмульфильмы» кытта бииргэ улэлиир бырайыакпыт. Үлэ кыбаарталын баазатыгар бэйэбит мультипликационнай киинэни оҥорон таһаарар улахан үөрэх булуогун аһары былаанныыбыт. «Союзмультфильм» билигин каадырдарга наадыйар уонна бастыҥ үөрэнээччилэрин хампаанньаҕа үлэҕэ ыларга бэлэм, ол иһигэр таһыттан үлэҕэ эмиэ», — диэтэ Ольга Грищенко.

Үөрэх бырагырааматын баһылааһын бары көрүҥүнэн – бүддьүөт, төлөбүрдээх уонна партнердар өйөбүллэринэн ыытыллар. Итиэннэ саамай талааннаах үөрэнээччилэргэ граннар көрүллүөхтэрэ.