Саха сиригэр өссө икки коронавирустаах киһи өллө

Ааспыт сууккаҕа Саха сиригэр икки Covid-19 инфекциянан сутуллубут киһи өллө. Бу туһунан өрөспүүбүлүкэтээҕи суһал штаб иһитиннэрэр.

«Икки коронавируһунан ыалдьыбыт киһи өлүүтэ бигэргэннэ, иккиэн араас атын хроническай ыарыылаахтара биллэр», – диэн этиллэр.

Бүгүҥҥү туругунан 34 ыарыһах туруга ыараханынан сыаналанар.

Ааспыт сууккаҕа өрөспүүбүлүкэ лабораторияларыгар 2542 коронавирус аналиһа чинчийилиннэ.

От ыйын 2 күнүн туругунан Саха сиригэр уопсайа 4315 киһи коронавирустаата, 3674 киһи эмтэннэ, 38 киһи суорума суолланна.