Саха сиригэр үүт соҕотуопката былаанынан баран иһэр

Үүтү соҕотуопкалааччылар аттарыллыбыт былаанынан үлэлииллэр диэн СӨ тыатын хаһаайыстыбатын министиэристибэтэ иһитиннэрэр.

От ыйын 2-с күнүн көрдүрүүтүнэн, өрөспүүбүлүкэҕэ 28 690 туонна үүт соҕотуопкаланна, бу сыллааҕы былаан (80 706 туонна) 35,5 %-гар тэҥнэһэр. Былырыын баччаларга 28 190 туонна үүт соҕотуопкаламмыта этиллэр.

Үүт соҕотуопкатын былаанын баһыйар өттүн муниципальнай тэриллиилэр үһүс бөлөхтөрө оҥорор. Ол курдук Мэҥэ Хаҥалас, Чурапчы уонна Сунтаар улуустара сылга сэттэлии тыһыынчаттан тахса туонна үүтү туттараллар.

Хаҥалас уонна Таатта улуустарын былааныгар алта тыһыынчаттан тахса туонна үүтү туттарыы баар. Амма, Бүлүү, Ньурба улуустара — биэстии тыһыынчаттан тахса туонна үүтү туттарар былааннаахтар.

Өрөспүүбүлүкэҕэ үүтү туттарыы көрдөрүүтэ үчүгэйэ, үгүс улуустар ыйдааҕы былааннарын куоһаран иһэллэрэ бэлиэтэнэр.

Өрөспүүбүлүкэҕэ үрдүк бэлэмнээх буолуу эрэһиимэ киириэҕиттэн, бары соҕотуопкалыыр тэрилтэлэр, нэһилиэктэргэ баар сыахтар үлэлэригэр санитарнай ирдэбиллэри тутуһаллар. Үлэһиттэр бары бэйэни көмүскэнэр уонна дезинфекциялыыр сириэстибэлэринэн хааччылыннылар.