Саха сиригэр «уһук илиҥҥи гектар» кыттыылаахтарыгар барыта 41 мөл солк тахса көрүллүбүт

Саха сиригэр «уһук илиҥҥи гектар» бырагыраама кыттыылаахтарыгар 41 мөлүйүөнтэн тахса солкуобайдаах көмө оҥоһулунна. Бу туһунан Уһук Илини уонна Арктиканы сайыннарыы министиэристибэтин пресс-сулууспата иһитиннэрдэ.

Хабаровскай кыраайга саамай элбэх суумалаах — 392 мөлүйүөн солкуобайга көмө оҥоһуллубут.

Сахалин уонна Амур уобаластарыгар «уһук илиҥҥи гектары» ылааччыларга өйөбүл чэрчитинэн 72 мөлүйүөн солкуобай бэриллибит, оттон Приморьеҕа — 49 мөлүйүөн солкуобайы көрбүттэр.

Гектар ылааччыларга барыта холбоон 700 мөлүйүөн солкуобайы тыырбыттар. Бырагыраама үлэлиэҕиттэн, «уһук илиҥҥи гектар» бырагыраама икки тыһыынча кыттыылааҕа сир учаастагын оҥосторугар өйөбүл миэрэтин туһаммыт.

«Уһук илиҥҥи гектары» ылааччылар судаарыстыбаттан көрүллэр өйөбүлү көхтөөхтүк туһаналлар. Ылбыт граннарынан уонна субсидияларынан, чэпчэтиилээх кредиттэринэн уонна да атын көмө миэрэтинэн тыа хаһаайыстыбатын бырайыактарын олоххо киллэрэллэр, гостиницалары, маҕаһыыннары, массыына сиэрбистэрин уонна да үгүһү арыналлар. Бырагыраама үлэлиэҕиттэн, сир учаастагын ылааччыларга оҥоһуллубут көмө харчы барыта 700 мөлүйүөн солкуобайга тэҥнэһэр», — диэтэ Уһук Илиҥҥэ киһи хапытаалын сайыннарыы Ааҕыныстыбатын генеральнай дириэктэрэ Сергей Ховрат.

Ааҕыныстыба дааннайдарынан, 2019 сыл алтынньы саҥатын туругунан «уһук илиҥҥи гектар» бырагырааманан 72 тыһыынчаттан тахса киһи сир учаастагын ылбыт.

Бэлиэтээн эттэххэ, бырагырааманан сир учаастагын ыларга «НаДальнийВосток.РФ» сайт көмөтүнэн босхо суруйтарыахха сөп.