Саха сиригэр уон култуура дьиэтэ өрөмүөннэниэ уонна тутуллуо

Россия бэрэсидьиэнэ Владимир Путин 2018 сыллаахха олохтообут «Култуура» национальнай бырайыагын чэрчитинэн тыа сиригэр култуура дьиэлэрин тутуу, библиотекалары саҥатытыы, оҕо ускуустубатын оскуолаларын өрөмүөннээһин былааннанар.

2020 сылга Саха сирин оҕо ускуустубатын уонна култууратын дьиэлэрин өрөмүөннүүргэ, үлэһиттэри үөрэтэргэ, култуура виртуальнай объектарын оҥорорго ураты болҕомто ууруллуоҕа.

Алдаҥҥа виртуальнай кэнсиэр саалата уонна Дьокуускайга национальнай художественнай түмэл виртуальнай мультимедиагида оҥоһуллуоҕа. Дьокуускайдааҕы «Созвездие» киин библиотека ситимин уонна Тикси бөһүөлэгин оҕо бибилиотекатын саҥатытыахтара.

Национальнай бырайыак чэрчитинэн Аппааны сэлиэнньэтигэр култуура киинин тутуута саҕаланыаҕа. Федеральнай үбүлээһининэн Уһун Күөл уонна Бэрдьигэстээх сэлиэнньэлэригэр, ону тэҥэ Үөһээ Халымаҕа Угольнай уонна Өлүөхүмэҕэ Заречнай бөһүөлэктэргэ култуура дьиэлэрэ өрөмүөннэниэхтэрэ. Тутуулар 2021 сылга үлэҕэ киирэллэрэ былааннанар.

Алдаҥҥа оҕо ускуустубатын оскуолатын 12 мөлүйүөн солкуобай суумалаах өрөмүөнүн бырайыага бэлэм. Амма улууһугар оҕо ускуустубатын оскуолатын өрөмүөнүн бырайыага былааннанар.

 292 култуура үлэһитэ дойду бастыҥ үрдүк үөрэх кыһаталарыгар квалификацияны үрдэтии куурустарын ааһыахтара. Саха сирэ 2021 сылга саҥа киинэ саалаларын арыйыыга Киинэ пуондатын куонкуруһар кыттыыны ылара былааннанар.

«2019 сыл түмүгүнэн Саха сирэ «Култуура» национальнай бырайыагы ситиһиилээхтик толордо уонна Уһук Илиҥҥи регионнар истэригэр биир бастыҥ көрдөрүүлээҕинэн ааттаммыта», —диэн СӨ Култуураҕа уонна духуобунай сайдыыга миниистирэ Юрий Куприянов эттэ.

Владимир Путин сорудаҕынан 2019 сыллаахха Уус Алдан улууһун Сыырдааҕар уонна Горнай улуус Дьикимдэтигэр икки култуура дьиэтэ тутуллубута. Аҕыс оҕо ускуустубатын оскуолата саҥа музыкальнай инструменнарынан уонна үөрэх тээбириннэринэн хаччыйыллыбыттара.