Саха сиригэр устудьуоннар бэйэни салайыныыларын форумнара ыытыллыа

Дьокуускайдааҕы тыа хаһаайыстыбатын акдемиятыгар «Лидер академията» диэн устудьуоннар бэйэни салайыныыларын форума 2019 сыл ахсынньы 15 күнүттэн 17 күнүгэр диэри ыытыллыаҕа. Бу туһунан СӨ ыччат уонна социальнай коммуникация миниистиэристибэтин пресс-сулууспата иһитиннэрэр.

Форум бырагыраамата «Устудьуон кулууба», «Баҕа өттүнэн» (Добровольчество), «Устудьуон этэрээтэ», «Айар ыччат» диэн түөрт хайысханан тэриллиэ, диэн бэлиэтииллэр.

Форум чэрчитинэн, семинардар, маастар-кылаастар ыытыллыахтара, ыччат үлэтин-хамнаһын уонна өрөспүүбүлүкэ устудьуоннарын общественнай түмсүүлэрин презентациялыахтара, «Диалог на равных» диэн биллэр, ситиһиилээх дьону кытта айар тэрээһин буолуо.

«Устудьуоннар холбоһуктарын кытта үлэлэһии – Росмолодежь үлэтин биир сүрүн хайысхата». Биһиги олус тоҕоостоох бырайыагы бэлэмнээн федеральнай өйөбүлү ылары ситистибит.  Билигин форумҥа бэлэмнэнэн устудьуоннартан хамаандалары тэрийдибит. Кинилэр бэйэлэрин хайысхаларынан бырагыраамма бэлэмнииллэр, форум кэмигэр үлэлиир эспиэрдэри талаллар. Бу туһунан ыччат дьыалаларыгар федеральнай агентство гранын кыайыылааҕа, Саха сиринээҕи ыччат бырабыыталыстыбатын бэрэссэдээтэлэ Василина Лукина иһитиннэрдэ.