Саха сиригэр устудьуоннар этэрээттэрин сайыҥҥы сезона саҕаланна

Бүгүн, бэс ыйын 12 күнүгэр өрөспүүбүлүкэ устудьуоннарын этэрээттэрин сайыҥҥы үлэлэрин симиэнэтин аһыллыыта ааста. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Быйылгы дьылга эһиэхэ улахан эппиэтинэс сүктэрилиннэ. Эһигини тутааччылар, тимир суол үлэһиттэрэ, тупсарыы үлэлэрэ ыытыллар нэһилиэнньэлээх пууннара, тыа хаһаайыстыбатын салаатын тэрилтэлэрэ күүтэллэр» — диэн Айсен Николаев этэрээттэргэ туһаайан эттэ.

Ил Дархан устудьуоннар этэрээттэрин чилиэннэрэ туруоруллубут соруктары толоруохтара уонна идэтийбит таһымнарын үрдэтиэхтэрэ диэн эрэнэрин биллэрдэ.

Быйылгы сезоҥҥа өрөспүүбүлүкэ араас улуустарыгар 2000-тан тахса устудьуон үлэлиирэ этиллэр. Үлэ сүрүн тирэҕэ тутуу эйгэтигэр ыытыллыаҕа.