Саха сиригэр уу суолунан сырыы түмүктэнэн эрэр

Саха сиригэр уу суолунан сырыы сүрүннээн түмүктэннэ. Сарсын Өлүөнэ өрүскэ таһаҕастаах бүтэһик суудуна киириэ.

Быйылгы дьылга барыта мөлүйүөн тоннаттан тахса таһаҕаһы, ол эбэтэр былааннаммыт 98 бырыһыанын тиэртилэр. Билигин «Сургутнефтегаз»   наадатыгар 13 тыһыынча тонна сүөкэниэхтээх.

Атын өрүстэргэ үлэ толору түмүктэннэ. Индигиир өрүскэ уу таһыма түһэн, тыһыынча тонна кэриҥэ ньиэп тиэммит баржа чаардаан турар.

Билигин итиннэ кыдьымах балысханнык киирэр. Онон суудунаны манна кыстатар итиэннэ ньиэби кыһыҥҥы суолунан тиэйэр туһунан боппуруоһу быһаараллар.

«Индигиир өрүһүнэн Хонууга тиийиэхтээх тыһыынча тонна кэриҥэ ньиэп тиийбэтэ. Ол гынан баран быйыл кыһыны туоруур уматык баар. Тиийиэхтээх ньиэп саппааспыт этэ. Кыһыҥҥы суолунан массыынанан тиэрдэри туруорсуохпут», — диэтэ нэһилиэнньэ олоҕор куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Дмитрий Местников.