Саха сирин 1093 олохтооҕо бэйэтэ дьарыктаах дьон быһыытынан регистрацияланна

От ыйын 1 күнүттэн бэйэтэ дьарыктаах дьоҥҥо киирбит нолуогабай эрэһиимҥэ өрөспүүбүлүкэ 34 улууһун, ону тэҥэ Дьокуускай уонна Жатай куораттар 1093 олохтоохторо регистрацияланнылар. Бу туһунан Россия нолуогабай сулууспатын өрөспүүбүлүкэтэээҕи салаата иһитиннэрэр.

Саамай элбэх киһи регистрацияламмыт биэс маҥнайгы улуус: Мииринэй оройуона — 86 киһи, Нерюнгри — 79, Ленскэй — 41, Алдан — 35, Хаҥалас- 34 киһи. Дьокуускайга — 535 киһи бэйэ дьарыктаах буолла, Жатайга — 8.

Атырдьах ыйын 14 күнүн туругунан Мэҥэ Хаҥаласка 32 киһи регистрацияланна, Сунтаарга— 27, Намҥа — 19, Чурапчыга— 18, Ньурбаҕа — 17.

Саха сиригэр бэйэ дьарыктаах дьоҥҥо саҥа нолуогабай эрэһиим 2020 сыл от ыйын 1 күнүттэн Россия бэрэсидьиэнэ Владимир Путин дьаһалынан үлэҕэ киирбитэ.

Саҥа нолуогабай эрэһиим инники дойду түөрт регионугар пилотнай бырайыак быһыытынан үлэлээн саҕалаабыта. Ол кэнниттэн 2020 сыл тохсунньу 1 күнүттэн 2020 сыл от ыйын 1 күнүгэр диэри хас да түһүмэҕинэн атын регионнарга киирдэ. Сорох регионнарга саҥа эрэһиин балаҕан ыйыттан олохтонуоҕа.

Нолуогабай инспиэксийэ бэлиэтииринэн, бэйэ дьарыктаах дьон «Мин нолуогум» («Мой налог») сыһыарыы нөҥүө регистрацияланан баран, каассабай аппараата, дохуот декларацията, страховой усунуоһа суох, аччатыллыбыт нолуогабай ставканы туһанан (физическэй сирэйдэртэн киирбит доухуоттан — 4%, урбаанньыттарьат уонна тэрилтэлэртэн киирбит дохуо — 6%) үлэлиир кыахтаахтар.

Бэйэ дьарыктаах дьонунан наймылаһан үлэлиир киһитэ суох, 2,4 мөлүөн солкуобайга диэри дохуоттаах дьон буолуохтарын сөп.