Саха сирин 25 култууратын дьиэтэ федеральнай субсидия ылыаҕа

Тыа сирин култууратын дьиэлэрэ материальнай-техническай баазаларын сайыннарыыга уонна бөҕөргөтүүгэ федеральнай үбүлээһини ылыахтара. Бу туһунан СӨ култуураҕа министиэристибэтэ иһитиннэрэр.

«Субсидия ылааччылар куонкурус нөҥүө быһаарыллаллар. Сүрүн ирдэбиллэртэн биирдэстэринэн култуура дьиэлэрин материальнай-техническай баазаларын бөҕөргөтүүнү олохтоох бэйэни салайыныы хос үбүлүөхтээх», — диэн өрөспүүбүлүкэ култуураҕа уонна духуобунай сайдыыга миниистирин бастакы солбуйааччыта Владислав Левочкин эттэ.

Күлтүүра тэрилтэтэ бүтүн Россиятааҕы уонна өрөспүүбүлүкэтээҕи куонкурустарга ситиһиилэрдээх буолуохтааҕын, самодеятельность кыттааччыларын элбиллиитэ көстүөхтээҕин, тэрилтэ штатыгар нэһилиэнньэ сынньалаҥын тэрийиигэ анал идэлээх специалистар баар буолуохтаахтарын Владислав Левочкин бэлиэтээтэ.

Субсидияны 25 муниципальнай тэриллии ылыаҕа. Көрүллүбүт үп 2020 сылтан саҕалаан 2022 сылга диэри бэриллиэҕэ. 20 муниципалитет материальнай-техническай баазатын бөҕөргөтөрү былаанныыр, биэс — эбийиэк өрөмүөнүн ыытыыны.

Улуустар ылар үптэрин уопсай суумата – 29,1 мөлүйүөн солкуобайга тэҥнэһэр.