Саха сирин 34 олохтооҕо «Агростартап» куонкурус гранын ылбыт

2020 сылга өрөспүүбүлүкэҕэ икки түһүмэҕинэн ыытыллыбыт «Агростартап» куонкурус түмүгэр Саха сирин 34 олохтооҕо гран ылбыт. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

«Өрөспүүбүлүкэ бары улуустарыттан барыта 800 мөлүйүөн солкуобайы куоһарар үбүлээһиннээх 242 сайаапка киирбит, олортон 22 улуустан 158 сайаапка бырайыагы көмүскээһиҥҥэ ааспыт», — диэн этиллэр.

Түмүккэ уопсайа 115 мөлүйүөн солкуобай үбүлээһиннээх 34 сайаапка талыллыбыт. Куонкурус кыайыылаахтара бу үбү сүөһүнү, тиэхиньикэни, тыа хаһаайыстыбатын бородууксуйатын оҥорон таһаарар оборудованиены, сир учаастактарын ылыыга, эбийиэктэри инженернэй ситимҥэргэ холбооһуҥҥа туһаныахтарын сөп.

Гран ылааччылар бу бырайыактарын олоххо киллэрдэхтэринэ 64 саҥа үлэ миэстэтэ тэриллэрэ бэлиэтэнэр.