Саха сирин 9 тыһ. тахса медицинскэй үлэһитин коронавируһу утары үлэҕэ үөрэтиэхтэрэ

Россия бэрэсидьиэнэ Владимир Путин соругунан, Саха сиригэр 9 тыһыынчаттан тахса медицинскэй үлэһити коронавирус инфекциятын утары охсуһууга үөрэтии былааннанар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Өрөспүүбүлүкэтээҕи доруобуйа харыстабылын министиэристибэтин дааннайынан, 9 тыһыынчаттан тахса орто медицинскэй үлэһити үөрэтии ирдэнэр. Олортон 5,5 тыһыынчата хайыы үйэ үөрэнэ сылдьар. Үс тыһыынчаттан тахса киһи квалификацияны үрдэтии дастабарыанньатын туппута», — диэн СӨ үөрэҕириигэ уонна наукаҕа миниистирэ Михаил Сивцев кэпсээтэ.

Үөрэтии Дьокуускайдааҕы, Алданнааҕы, Нерюнгритээҕи медицинскэй колледжтарга уонна Жатайдааҕы техникумҥа ыытыллар. Бары үөрэх бырагыраамалара Россиятааҕы доруобуйа харыстабылын министиэристибэтин быстала суох медицинскэй уонна фармацевтическэй үөрэхтээһинин порталыгар аккредитацияны ааспыттара.

«Бырагыраама уһуна 36 чааска тэҥнэһэр, теоретическэй уонна практическай чаастартан турар. Үөрэх хаачыстыбатын туһаҕа таһаарыыны ситиһэргэ видеоуруоктар туһаныллаллар, итиэннэ хас биирдии түһүмэххэ тест хонтуруол баар», — диэн Михаил Сивцев эттэ.

Биир үөрэх платформатыгар икки тыһыынчаҕа тиийэ киһи тэҥҥэ үөрэниэн сөптөөҕө бэлиэтэнэр. Дьокуускайдааҕы медицинскэй колледж саамай үрдүк биир кэмҥэ үөрэтиини көрдөрдө — 1,6 тыһыынча киһи. Интернет сибээһэ мөлтөх, тиийэргэ уустук нэһилиэнньэлээх пууннарга медицинскэй үлэһиттэри үөрэтии индивидуальнай графигынан ыытылар.