Саха сирин 980-тан тахса оскуолата саҥа үөрэх дьылыгар бэлэм

НВК САХА – Баһаарынай кэтэбил уорганнара өрөспүүбүлүкэ 984 уопсай үөрэхтээһин тэрилтэлэрин бэрэбиэркэлээтилэр. Бу туһунан ЫБММ пресс-сулууспата атырдьах ыйын 23 күнүнээҕи дааннайдары иһитиннэрдэ.

“Бүгүҥҥү күҥҥэ баһаарынай куттал суох буолуу ирдэбиллэрин кэһии Абый, Үөһээ Халыма, Томпо уонна Уус Алдан улуустарыгар бааллар. Атырдьах ыйын 30 күнүн диэки бэрэбиэркэ түмүктэниэ”, – диэн иһитиннэриигэ этиллэр.

Баһаарынай кэтэбил инспектордара баһаарынай сигнализацияны, дьону дьиэттэн таһаартыырга иһитиннэрии, тахсар ааннары, туох мэһэйдэр баалларын, баһаары умуруорар тэриллэр хайдах туруктаахтарын, докумуоннары бэрэбиэркэлииллэр.

Саха сиригэр 2019-2020 сыллааҕы үөрэх дьылыгар  1359 үөрэх тэрилтэтэ үлэлиэ. Манна оскуолалар, оҕо уһуйааннара, орто анал уонна үрдүк, эбии үөрэхтээһин кыһалара киирэллэр.