Саха сирин аэропортарын тупсарсыахтара

НВК САХА – Ил Дархан Айсен Николаев уонна Россия тырааныспарка миниистирэ Евгений Дитрих Саха сирин аэропортарын тупсарыы туһунан Нерюнгригэ сүбэ мунньахха 2024 сылга диэри 15 аэропорту тупсарыахтаахтарын туһунан иһитиннэрдилэр. Ааспыт сылга Тиксиигэ, Саккырыырга уонна Чокурдаахха аэропортары саҥардан биэрбиттэрэ. Ордук далааһыннаах үлэ Нерюнгри аэропордун тупсарыыга барбыта. Ол курдук, Нерюнгри аэропордун  көтөр балаһатын уонна инфраструктуратын оҥорор үлэҕэ анаан федеральнай хааһынаттан 7 миллиард солкуобай, Өлүөхүмэ аэропордугар 2,5 миллиард солкуобай тыырылынна.

Санатан эттэххэ, Дьокуускай, Нерюнгри, Мирнэй уонна бары хоту улуустар аэропортарын тупсарыы боппуруоһун Ил Дархан Айсен Николаев Евгений Дитриҕы кытта өссө былырыын кэпсэтэн саҕалаабыттара.