Саха сирин алын уонна орто урбаанньыттарыгар нолуогабай чэпчэтиилэр көрүллүөхтэрэ

Өрөспүүбүлүкэ салалтата коронавирус тарҕаныытын сэрэтии миэрэлэринэн биллэриллибит муҥутуур бэлэм буолуу эрэһиимин кэмигэр урбаанньыттары өйүүр миэрэлэри ылынна. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Үөскээбит усулуобуйа олус уустук, чуолаан гостиница өҥөтүн, туризм, уопсастыбаннай аһы-үөлү тэрийии эйгэлэригэр. Бу бизнес көрүҥнэрэ өҥөнөн туһанааччылара аччаабыттарынан уонна уопсай экономическэй усулуобуйанан улахан ыарахаттары көрүстүлэр. Кинилэргэ судаарыстыба көмөтө ирдэнэр», — диэн Ил Дархан Айсен Николаев эттэ.

Гостиница, туризм, уопсастыбаннай ас-үөл, үөрэҕирии, доруобуйа харыстабылын, култуурнай, аралдьытар, бытовой, физическэй култуура уонна спорт эйгэлэригэр өҥөлөрү тэрийэр алын уонна орто урбаанньыттары, 2020 сыл устата чэпчэтиллибит нолуогабай систиэмэнэн нолуок ставкатын кээмэйэ дохуокка 1 %-ҥа диэри, барыыска 5 %-ҥа диэри намтыаҕа.

Маны тэҥэ, гостиница уонна ресторан өҥөтүн тэрийэр урбаанньыттар — баай-дуол, уопсастыбаннай оптуобустарынан нэһилиэнньэни таһыы өҥөтүн тэрийэр урбаанньыттар тырааныспар түһээниттэн 2020 сылга босхолонуохтара.

Өрөспүүбүлүкэ бары улуустарын уонна куорат уокуруктарын олохтоох бэйэни салайыныы уорганнарыгар биир кэлим быстах кэмнээх дохуот нолуогун К2 коэффициенын кээмэйин нуулга диэри түһэрэргэ уонна сир түһээнигэр чэпчэтиилэри олохтуурга этилиннэ.

Ону тэҥэ, судаарыстыбаннай уонна муниципальнай эбийиэктэри куортамныыр атыы-эргиэн уонна гостиница өҥөтүн оҥорор алын уонна орто урбаан тэрилтэлэригэр, муҥутуур бэлэм буолуу эрэһиимэ түмүктэниэр диэри куортам төлөбүрүн уһатар кыах биэриэхтэрэ. Маныаха куортам кээмэйэ коммунальнай өҥө ороскуотун кээмэйигэр диэри намтатыллыаҕа.

Инники этиллибитинэн, Россия бэрэсидьиэнэ Владимир Путин эпидемиологическэй усулуобуйа чөлүгэр түһүөр диэри урбаанньыттары бэрэбиэркэлэртэн уонна иэһи төлүүр эбэһээтэлистибэттэн төһө кыалларынан босхолуурга ыҥырбыта.