Саха сирин бөҕөһө Польшаҕа көҥүл тустуу чемпионатыгар кыайда

Саха сирин бөҕөһө Эдуард Григорьев Польшаҕа ыытыллыбыт көҥүл тустуу чемпионатыгар кыайда. Бу туһунан «Спорт Якутии» иһитиннэрэр.

Алтынньы 9-10 күннэригэр Кротошин куоракка көҥүл тустууга Польша чемпионата ыытылынна. «Өрөспүүбүлүкэтээҕи спортивнай бэлэмнэнии киинин Чурапчытааҕы салаатын» иитиллээччитэ Эдуард Григорьев 65 киилэҕэ диэри категорияҕа кииристэ уонна көбүөргэ түөрт хапсыһыыга кытынна.

«Эдуард Польша сүүмэрдэммит хамаандатыгар кыайыытын бигэргэттэ. Ол курдук кини тохсунньу ыйга дойду кубогар кыайбыта, оттон бу сырыыга Польша чемпионатын кыайыылааҕа буолла. Биһиэхэ кыайыы эрэ буолбакка, эрэллээхтик кыайыы наада этэ», — диэн тренер Данил Неустроев кэпсээтэ.

Тренер этэринэн, хааччахтааһын кэмигэр бөҕөс тэтимнээхтик дьарыктаммыт. Чемпионат кэмигэр Григорьев утарылаһааччыларыгар биир да баалы биэрбэккэ, хапсыһыыга барытыгар кыайда.

«Аан дойду чемпионатыгар бэлэмнэнии чэрчитинэн, атын чемпионаттарга кыттары былаанныыбыт. Минскэй уонна Киев турнирдарыгар киирсиэхпитин баҕарабыт. Манна Эдуард 65 киилэҕэ диэри ыйааһыҥҥа , оттон аан дойду чемпионатыгар 61 киилэҕэ диэри ыйааһыҥҥа киирсиэҕэ», — диэн Данил Неустроев бэлиэтээтэ.