Саха сиригэр үөрэх дьыла балаҕан ыйын 1 күнүттэн саҕаланыаҕа

Бары үөрэх тэрилтэлэригэр — оҕо уһуйааннарыгар, оскуолаларга, орто, үрдүк үөрэх тэрилтэлэригэр 2020 сыл балаҕан ыйын 1 күнүттэн үөрэх дьыла үгэс быһыытынан саҕаланыаҕа. Бу туһунан СӨ Үөрэҕин уонна наукатын министиэристибэтин пресс-сулууспата иһитиннэрэр.

Министиэристибэ уонна дьаһалта бэрэстэбиитэллэрэ кэлэр үөрэх дьылыгар  үөрэтии хаамыытын тэрийии боппуруостарын төгүрүк остуол тула сүбэлэстилэр.

«Үөрэх дьыла балаҕан ыйын 1 күнүттэн өрөспүүбүлүкэ бары үөрэҕин тэрилтэлэригэр үгэс быһыытынан саҕаланыаҕа. Тэрилтэлэргэ бэлэмнэнии үлэтэ ыытыллар. Ону тэҥэ СӨ Үөрэҕин уонна наукатын министиэристибэтин кытта  коронавирус инпиэксийэтэ тарҕаныытын утары охсуһар, куттала суох буолуу миэрэтэ ылыллар түгэнигэр атын халыыптар көрүллэллэр», — диэн иһитиннэрдэ өрөспүүбүлүкэ Үөрэҕин уонна наукатын министиэристибэтин миниистирин бастакы солбуйааччыта Ирина Любимова.

Үөрэх тэрилтэлэрин салайааччылара, Үөрэҕи сайыннарыы, уонна квалификацияны үрдэтии үнүстүүтүн салайыытынан оскуола дириэктэрдэрэ, үөрэтии хаамыытын тэрийии халыыбын оҥордулар.

«Халыыпка эпидемия араас хаамыыта уонна оҕо ахсаана көрүлүннэ. Оҕо уһуйааннара урукку эрэһииминэн үлэлиэхтэрэ, ону тэҥэ балаһыанньа уларыйар түгэнигэр эбии дьуһуурунай бөлөхтөр эмиэ учуоттаннылар. Онтон сиэттэрэн, бастатан туран, кылааска 15-тэн элбэҕэ суох оҕо үөрэниэхтээҕинэн оскуолаларга биэс халыып тэрилиннэ» — диэтэ Ирина Любимова.

Бастакы халыып — биирдии кылаастаах оскуолаларга Роспотребнадзор ирдэбилин барытын тутуһан туран үөрэтии, иккис халыып — биир сменанан үөрэнэр оскуола икки сменанан үөрэниигэ көһүүтэ, үһүс халыып — сирэй уонна дистанционнай үөрэҕи икки сменанан ыытыы. Төрдүс уонна бэһис халыыптар — улахан оскуолаларга сирэй уонна кэтэхтэн үөрэҕи үс сменанан ыытыы.

Оскуолалары уонна оҕо уһуйааннарын дезинфекциялыыр сириэстибэлэринэнэн, термометрынан, медицина арыаллааһынынан хааччыйыыга улахан болҕомто уурулларын миниистири солбуйааччы бэлиэтээтэ.