Саха сирин биэс улууһугар «Мин урбааным» кииннэр аһыллыахтара

«Кыра, орто урбааны уонна урбаанньыттары өйөөһүн» национальнай бырайыак чэрчитинэн, 2020 сыл түмүктэниэр диэри, өрөспүүбүлүкэ биэс улууһугар «Мин урбааным» өҥө оҥорор кииннэр аһыллыахтара. Бу туһунан СӨ Урбаан министиэристибэтин пресс-сулууспата иһитиннэрэр.

«Бүгүҥҥү күҥҥэ Киин филиаллара өрөспүүбүлүкэ уон улууһугар үлэлииллэр, сыл түмүктэниитэ эбии биэс улууска аһыллара былааннанар: Өлүөхүмэҕэ, Тааттаҕа, Томпоҕо уонна Хаҥаласка», — диэн иһитиннэриигэ этиллэр.

Үлэлии сылдьар урбаанньыттар уонна урбаан тэринэргэ былааннанар гражданнар урбааны сайыннарыыга уонна салайыыга туһааннаах өҥөнү «биир түннүктэн» ылыахтарын сөп. Киин үлэһиттэрэ судаарыстыбаннай уонна муниципальнай өйөбүл миэрэтинэн эмиэ сүбэ-ама биэриэхтэрэ.

«2018 сыллаахха РФ Экономика сайдыытын министиэристибэтин кэмпириэнсийэтигэр ситиһиилээхтик көмүскээбиппит түмүгэр, кыра уонна орто урбаан национальнай бырайыак чэрчитинэн, урбааны сайыннарар бары институттар өҥөлөрүн биир сиргэ түмэр соруктаах «Мин урбааным» кииннэри тэрийиигэ федеральнай үбүлээһин көрүллүөҕэ», — диэн Саха сиринээҕи урбаан, атыы-эргиэн уонна туризм миниистирэ Ирина Высоких бэлиэтээтэ.

Кыра, орто урбааны уонна урбаанньыттары өйүүр национальнай бырайыак чэрчитинэн, өрөспүүбүлүкэҕэ биэс бырайыак олоххо киирдэ: «Кыра уонна орто урбаан субъектарын акселерациялааһын», «Урбааны сайыннарыы», «Кыра уонна орто урбаан субъектарын үбүлээһин, ол иһигэр чэпчэтиилээх үбүлээһини туһанар кыахтарын кэҥэтии», «Урбааны салайыы усулуобуйатын тупсарыы», «Тыа хаһаайыстыбатыгар кооперациялары сайыннарыы уонна фермердэри өйүүр систиэмэни тэрийии».