Саха сирин биллиилээх дьоно көрбөттөр библиотекаларыгар аудио кинигэлэри устуохтара

«Кыайыы куолаһа» акция чэрчитинэн өрөспүүбүлүкэ биллэр дьоно көрбөттөр библиотекаларыгар аудио кинигэлэри устуохтара. Бу туһунан култуура министиэристибэтин пресс-сулууспата иһитиннэрэр.

Акция автора уонна СӨ кулуутураҕа уонна духуобунай сайдыыга миниистирэ Юрий Куприянов «Саллаат сүрэҕэ» диэнТимофей Сметанин айымньытын маҥнайгынан устан саҕалаата.

Маннык аудио кинигэлэри устууга Саха сирин министиэристибэлэрэ, тэрилтэлэр салаалара, ону тэҥэ култуура эйгэтин тэриллиилэрэ кыттыыны ылыахтара.

Акция кыттыылаахтара библиотека бэлэмнээбит саха суруйааччыларын нууччалыы да, сахалыы да айымньыларыттан прозаны, лириканы саҥардыахтара.

«Библиотека үлэһиттэрин көмөлөрүнэн көрбөт ааҕааччыларга аудио кинигэни оҥордубут. Биһиги норуоппут Улуу Кыайыыны бэлиэтиир сыла чугаһаан иһэр. Норуот өлбөт үйэлээх хорсун быһыытын көлүөнэттэн көлүөнэҕэ тиэрдэн иһэр сүрүн соруктаахпыт. Хас биирдии киһи бэйэтин кылаатын киллэриэ диэн бигэ эрэллээхпин», — диэн Юрий Куприянов эттэ.

Кини бу акцияҕа СӨ экологияҕа миниистирин  Сахамин Афанасьевы уонна СӨ ыччат уонна социальнай коммуникация миниистирин Степан Саргыдаевы кыттыыны ылалларыгар ыҥырда.

Аудио кинигэ бастакы чааһын 2020 сыл муус устар ый бүтүөр диэри устуохтара, ыам ыйыгар сүрэхтиэхтэрэ. Ол кэннэ акция үлэтин салҕыа, диэн иһитиннэрэллэр.