Саха сирин филармониятын артыыһа Россия бырабыыталыстыбатын стипендиатынан буолла

«Symphonica ARTica» өрөспүүбүлүкэтээҕи симфоническай оркестр турбаларын бөлөҕүн концертмейстера Любомир Слепцов Россия бырабыыталыстыбатын бириэмийэтин ылла. Бу туһунан өрөспүүбүлүкэ филармониятын пресс-сулууспата иһитиннэрэр.

Любомир Слепцов  – музыка үрдүкү оскуолатын бүтэрбитэ, Саха сирин култууратын туйгуна, бүтүн Россиятааҕы уонна аан дойдутааҕы куонкурустар лауреаттара. Галина Кривошапко аатынан Саха сирин судаарыстыбаннай фелармониятын «Symphonica Artica» симфоническай оркестырыгар уонна «Lena River Brass» үрэр инструменнар оркестырдарыгар үлэлиир.

Россия бырабыыталыстыбатын култуура уонна искуустуба 100 эдэр деятеллэригэр стипендията 2014 сылтан олохтоммут. Бириэмийэ култуура уонна искуустуба регионнааҕы тэрилтэлэригэр үлэлиир эдэр деятеллэргэ ананар уонна биир сыл болдьохтоон төлөнөр.

Араас сылларга бу бириэмийэ стипендиаттарынан Саха сирин судаарыстыбаннай филармониятын артыыстара Павел Васильев, Лена Дедюкина уонна Дмитрий Швецов буола сылдьыбыттара.