Саха сирин хаһаайыстыбалара кыстыкка бэлэмнэнэллэр

Саха сирин сүөһүлээх-астаах ыаллара уонна хаһаайыстыбалар 185 тыһыынча ынах сүөһүнү уонна биир оччо кэриҥэ сылгыны быйылгы кыстыкка киллэрээри түбүгүрэллэр.

Ааспыт сылларга холоотоххо, кыстык от саппааһа үчүгэй. Кураан сайын ааспытын да иһин 457 тыһыынча тонна от бэлэмнэннэ.

Уустук усулуобуйа Дьааҥы улууһугар олохтонно. Ону быһаарыыга мобильнай биригээдэ үлэтигэр өрөспүүбүлүкэ буддьүөтүттэн 10 мөлүйүөн солкуобай көрүлүннэ. Бу миэрэ улууска кыстык от бэлэмнээһинин 70 %-нын толорууну хааччыйыа.

Дьааҥыга Таатта улууһуттан биир тыһыынча тонна оту тириэрдэр былаан баар. Ону тэҥэ улуус хаһаайыстыбалара 400 тонна сүөһү эбии аһылыгын ыларга сайаапка түһэрдилэр.

«Барыллаан ааҕарбытынан, 12 кормовой единицанан кыстыахтаахпыт. Комбикорм, зернофураж уона да атын сүөһү эбии аһылыга кэмиэрчэскэй структураларга баар, онон суол турда да, улуус баһылыктара ирдэнэр наада баарынан көрдүөхтээхтэр», — диэн СӨ Тыа хаһаайыстыбатын миниистирин солбуйааччы Николай Афанасьев кэпсээтэ.

Кыстык от таһынан, хаһаайыстыбаларга саҥа хотоннор тутууларын ситэрэр үлэ ыыталлар. Амма улууһун «Кэскил» хаһаайыстыбата 120 ыанньыга кыстыыр хотонугар уота-күөһэ тардыллара хаалбыт. Ынах ыыр аппарааттаах, сүөһү уулуур иһиттээх, ону тэҥэ үлэһиттэргэ душтаах, сынньанар хостоох тутуу 50 %-на өрөспүүбүлүкэ бүддьүөтүттэн үбүлэммит.

«Хотоммут иккис уочаратын тутуохтаахпыт. Бырайыагын оҥотторон, эһиилги сүүмэрдээһиҥҥэ эмиэ кыттыбыт киһи диэн былааннаахпыт. Оччоҕуна ыанньыктарбыт бары үчүгэй хотоннорго үлэлиэ этилэр», — диэн «Кэскил» ХЭТ дириэктэрэ Александ Карманов санаатын үллэстэр.

Быйылгы кыстыкка Саха сиригэр 11 саҥа хотон үлэҕэ киириэхтээх.