Саха сирин хаһаайыстыбалара сайылыкка көһөллөр

Бу нэдиэлэҕэ өрөспүүбүлүкэ киин, Илин Эҥэр уонна Бүлүү бөлөх улуустарын хаһаайыстыбалара сайылыкка көһүүнү саҕалаатылар. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Сайылыкка көһүү олохтоох бородууксуйаны оҥорон таһаарыыны үрдэтиигэ олус суолталаах. Сайын устата ортотунан 40-50 тыһыынча тонна үүт туттарыллар, бу үүт сыллааҕы ыамын 23-25 %-гар тэҥнэһэр.

Барыллаан быһыытынан быйыл 41 949 төбө сүөһү, ол иһигэр 18 979 ынах сайыҥҥы учаастактарга көһөрүллүөҕэ. Маны тэҥэ 1651 үлэһит: 760 ыанньыксыт, 150 — үүт тутааччы, 237 — техник-осеменатор, 111 — ньирэй көрөөччү, 393 — сүөһү көрөөччү сайылыктарга үлэлиэхтэрэ .