Саха сирин хамаандата чэпчэки атлетикаҕа Россия чемпионатыгар 10 мэтээли ылла

Өрөспүүбүлүкэ сүүмэрдэммит хамаандата тирэнэр-хамсанар уорганнара эмэ5элээбит дьон икки ардыгар, чэпчэки атлетикаҕа Россия чемпионатыгар биир кыһыл көмүс, алта үрүҥ көмүс уонна үс боруонса мэтээли ылары ситистэ. Бу туһунан «Спорт Якутии» иһитиннэрэр.

Виктория Петрова ядрону анньыыга кыайда уонна диискэни быраҕыыга иккис миэстэ буолла. Василина Иванова ядрону анньыыга үрүҥ көмүс призер, диискэни быраҕыыга — боруонса.

Саргылан Семенов үстэ төхтүрүйэн ыстаныыга иккис миэстэ, 200 миэтэрэ уһуну сүүрүүгэ үһүс буолла. Дмитрий Усов 1500 миэтэрэҕэ сүүрүүгэ төрдүс уонна 800 миэтэрэҕэ — бэһис миэстэ буолла.

Никифор Анисимов диискэни быраҕыыга чемпионат үрүҥ көмүс призера буолла. Спартак Дорофеев уонна Яков Максимов ядрону анньыыга үрүҥ көмүс мэтээли ыллылар. Маны таһынан, Яков диискэни быраҕыыга үһүс миэстэ буолла. Виктор Евсеев үҥүүнү быраҕыыга төрдүс, ядрону анньыыга, диискэни быраҕыыга бэһис миэстэ буолла.

Күрэхтэһии алтынньы 2 күнүттэн 9 күнүгэр диэри Сочи куоракка ыытылынна. Россия 49 регионуттан 235 эр киһи уонна 87 дьахтар 100, 200, 400, 800, 1500, 5000 миэтэрэҕэ сүүрдүлэр, 4*100 эстэпиэтэҕэ, диискэни, үҥүүнү, клабы быраҕыыга, ядрону анньыыга, үрдүгү, уһуну уонна үстэ төхтүрүйэн ыстаныыга күрэхтэстилэр.