Саха сирин хотугу улуустарыгар муус суолунан сырыы саҕаланна

Дьааҥы улууһугар Верхоянскай куоратын уонна Боронук сэлиэнньэтин холбуур кыһыҥҥы муус суолунан сырыыны астылар. Бу туһунан СӨ тырааныспар уонна суол хаһаайыстыбатын министиэристибэтин пресс-сулууспата иһитиннэрэр.

«Сэтинньи 8 күнүттэн «Верхоянскай-Боронук» хайысханан муус суолунан сырыы саҕаланна. Сырыы 10 тоннаҕа диэри тиийэр ыйааһыннаах массыыналарга көҥүллэннэ. Массыыналар икки ардыларыгар муҥутуур кыра ырааҕа 70 миэтэрэҕэ тэҥнэһэр. Муус халыҥа 56 сантиметр!, — диэн этиллэр.

Сотору кэминэн «Боронук-Мачах-Иван Сирэ» суол аһыллыа. Ону тэҥэ сэтинньи 8 күнүгэр «Дьааҥы» айан суолун «Батагай — Эльгетск — Чөрүмчэ» хайысханан сырыы бэлэмин көрөр хамыыһыйа айаннаата.

Усуйаана улууһугар Уянди диэн киһи дэбигис тиийбэт нэһилиэнньэлээх пуунугар диэри кыһыҥҥы суолунан сырыы эмиэ саҕаланна. Ол курдук «Уус Куйга-Депутатскай-Үрүҥ Хайа» суолга 3 тоннаҕа диэри уйуктаах массыына сырыытын көҥүллээтилэр.

Кэлэр нэдиэлэҕэ Баатаҕай уонна Саккырыыр икки ардыгар суолу арыйыахтара.

Оттон Халыма улуустарыгар ичигэс күн-дьыл турар. Аллараа Халымаҕа өрүс букатын да тоҥо илик.