Саха сирин куораттарыгар толору изоляцияланыы эрэһиимэ биллэрилиннэ

Ил Дархан Айсен Николаев өрөспүүбүлүкэҕэ коронавирустан олохтоммут эмидемиологическэй туругунан сибээстээн, Дьокуускайга, Жатайга, Нерюнгригэ уонна Мииринэйгэ толору изоляцияланыы эрэһиимин биллэрдэ.

«Бүгүҥҥү киэһэттэн Дьокуускай куоракка, Жатай бөһүөлэгэр, Нерюнги уонна Мииринэй оройуоннарыгар толору изоляцияланыы эрэһиимэ биллэриллэр. Бу куораттар уонна оройуоннар Саха сирин киирэр аанынан буолаллар. Манна хайыы үйэ ыалдьыы түбэлтэлэрэ бэлиэтэммиттэрэ, эбэтэр тарҕанар кыахтара үрдүк», — диэн Айсен Николаев бүгүн, кулун тутар 30 күнүгэр өрөспүүбүлүкэ олохтоохторугар иһитиннэриитигэр эттэ.

Олохтоохтор ураты улахан кыһалҕа суох буоллаҕына, дьиэлэриттэн тахсаллара бобулларын Ил Дархан тоһоҕолоото. Үлэҕэ барыыттан ураты, чугас маҕаһыыҥҥа, бөх тоҕо уонна дьиэ кыылын күүлэйдэтэ тахсыы эрэ көҥүллэнэр.