Саха сирин үлэҕэ миниистиригэр быыгабар бэрилиннэ

Ил Дархан Айсен Николаев дьаһалынан СӨ үлэҕэ уонна социальнай сайдыыга миниистирэ Елена Волковаҕа коронавирус утары үлэ тустаах хонтуруола ыытыллыбатаҕын иһин быыгабар бэрилиннэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Өрөспүбүлүкэ баһылыгын дьаһалынан, нэһилиэнньэни социальнай хааччыйыы салааларын стационарнай тэрилтэлэригэр коронавирус инфекцията күүскэ тарҕаныытын утары ыытыллар үлэлэр тустаах хонтуруоллара ыытыллыбатаҕын иһин СӨ үлэҕэ уонна социальнай сайдыыга миниистирэ Елена Волковаҕа быыгабар биллэрилиннэ», — диэн этиллэр.

Санатар буоллахха, инники Саха сирин үс социальнай тэрилтэтигэр сүүстэн тахса киһи коронавирустаабытын туһунан иһитиннэриллибитэ.